Чамадан вайсковага прызначэння
№ 23 (1514) 05.06.2021 - 12.06.2021 г
Сайт “Парычы”
У першую чаргу тут назапашваюцца звесткі аб паходжанні прозвішчаў жыхароў аграгарадка, 51 паселішча на тэрыторыі Парыцкага сельсавета, якіх зараз няма ўжо на карце раёна, а таксама — збор матэрыялаў пра знакамітых землякоў, выданне буклетаў і кніг. Цягам 4-х гадоў з дапамогай баз даных Міністэрства абароны Расійскай Федэрацыі Валянціна Іванаўна вядзе самастойны пошук загінулых салдат падчас вайны на тэрыторыі раёна, змяшчае вынікі гэтых пошукаў на сайце “Парычы”, наладжвае стасункі з роднымі, якія потым прыязджаюць з розных куткоў Расіі, Украіны, суправаджае іх да месц пахавання.
Па прапанове расійскіх пошукавікоў Валянціна Пятрова і бібліятэкар Дуброўскай сельскай бібліятэкі Людміла Бусел за пошукавую дзейнасць узнагароджаны юбілейным медалём Расійскай Федэрацыі “75 гадоў Перамогі ў Вялікай Айчыннай вайне 1941 — 1945 гг.”.
Прыдумала і рэалізавала
У канцы мінулага года няўрымслівы бібліятэкар распачала новы праект — “Ваенны музей у чамадане”. Галоўная яго мэта — пазнаёміць маладое пакаленне з падзеямі апошняй вайны на тэрыторыі роднай мясцовасці, з мужнасцю і подзвігамі тых, каму мы абавязаны сёння за мірнае жыццё.
Штуршком для старту новага праекта стаў удзел бібліятэкара ў Парыцкім пошукавым атрадзе “Эстафета памяці”. А натхніў Валянціну Іванаўну на новую цікавую справу мясцовы краязнаўца Раман Цярэшчанка. Ён жа стаў і яе актыўным памочнікам. Прыняў удзел у краязнаўчых клопатах і член Парыцкага пошукавага атрада Уладзімір Дражын. Падтрымалі добрую справу ваенны камісар Светлагорскага і Акцябрскага раёнаў Аляксандр Іваніцкі і старшыня Парыцкага выканкама Аляксандр Цалка.
Чаму такая назва ў праекта? Таму што ў справу пайшоў самы звычайны стары чамадан. Валянціна Пятрова паклала ў яго экспанаты з ваеннай часткі экспазіцыі бібліятэчнага музея. Узяла “экспазіцыю” ў рукі і адправілася ў першую музейную вандроўку. Яна аказалася ўдалай.
Цяпер “дэсант” на чале з бібліятэкарам рэгулярна “высаджваецца” ў сельскіх школах раёна. У межах праекта Валянціна Іванаўна праводзіць медыягадзіны памяці, урокі мужнасці, падчас якіх ідзе гаворка пра аперацыю “Баграціён”, Азарыцкі канцлагер, подзвігі Герояў Вялікай Перамогі, што склалі галовы пры вызваленні раёна.
Кожны — пры справе
У кожнага ўдзельніка праекта свая задача. Уладзімір Дражын, напрыклад, распавядае пра зброю, якую выкарыстоўвалі байцы Чырвонай Арміі. Цікава, што патрымаць у руках сапраўдны пісталет, кулямёт альбо гранату жадаюць не толькі хлопчыкі, але і дзяўчынкі. Аб тым, як вядзецца пошук месцаў пахавання чырвонаармейцаў паведамляе з веданнем справы кіраўнік Парыцкага пошукавага атрада Раман Цярэшчанка. Кожная сустрэча не абыходзіцца без пытанняў школьнікаў, што сведчыць аб цікавасці маладога пакалення да падзей мінулага. “Бібліятэчны дэсант” пабываў ужо ў 5-ці сельскіх школах раёна. Акрамя гэтага, па ініцыятыве Валянціны Пятровай у межах праекта створаны падлеткавы пошукавы атрад, у які ўвайшлі навучэнцы 7 — 8 класаў Парыцкай школы. Валянціна Іванаўна вучыць хлопчыкаў і дзяўчынак весці пошук з дапамогай баз даных “Мемарыял”, “Подзвіг народа”, “Памяць народа”, арганізавала экскурсію на мемарыяльны комплекс “Ала”.
У юных пошукавікоў — цікавыя планы. У бліжэйшы час яны прымуць удзел у аўтапрабегу “Дарогай памяці”, які прымеркаваны да 80-годдзя пачатку Вялікай Айчыннай вайны. Плануецца пазнаёміцца неўзабаве з працай 52-га спецыялізаванага батальёна, які займаецца перапахаваннем загінулых байцоў Чырвонай Арміі, паўдзельнічаць у мітынгах-рэквіемах, а таксама падрыхтаваць для школьнікаў музейныя ўрокі з інтэрактыўнымі віктарынамі.
Валянціна РАСОШАНКА, галоўны бібліятэкар
аддзела бібліятэчнага маркетынгу Светлагорскай раённай бібліятэкі
